Í blaðnum hesa ferð:

Í blaðnum hesa ferð varpa vit í nøkrum greinum ljós á føroyskt sum annaðmál. Samrøða er við Duritu J. Jacobsen, lærara í Eysturskúlanum, har hon sigur, at tað er neyðugt at menna tilvitskuna um læring og fleirmæltar næmingar. Formaðurin í mentanarnevndini hjá Løgtinginum, Sólvit Nolsøe, sigur, at vit mugu raðfesta útbúgvingina av lærarum í føroyskum sum annaðmál. Sissal M. Rasmussen, ph.d. adjunktur á Føroyamálsdeildini, er samd. Hon sigur, at vit eiga áhaldandi at útbúgva undirvísarar í føroyskum sum annaðmál. Djóni N. Joensen, landsstýrismaður við barna- og útbúgvingarmálum, sigur, at vit eru ávegis at finna loysnir, tá ið talan er um føroyskt sum annaðmál.

Aðrar samrøður eru eisini: Við Torfinn Højgaard, sum í vár fór frá fyri aldur, um drúgvu yrkisleiðina sum lærari, við Fridu Poulsen, útbúgvingarleiðara á Námsvísindadeildini, um eftirmetingina av læraraútbúgvingini, við Mary-Ann Zachariassen, lærari í Fuglafjarðar skúla, um tá teknmál er fyrstamál, og við Djóna N. Joensen, landsstýrismann, um raðfesting av flokslæraranum. Umrøður eru av ymiskum, eitt nú skeiði í filosofi í skúlanum, sum er boðið út, og av nýggjum og hugfangandi lívfrøðitilfari til 7., 8. og 9. flokk, sum leggur upp til kannandi, reflekterandi og verkliga undirvísing.