Lærarafelagið havt vitjan av grønlendska lærarafelagnum
Føroya Lærarafelag hevur havt vitjan av nevnd og starvsfólki hjá grønlendska lærarafelagnum, IMAK.02.06.2023
Ferðin var ein arbeiðsferð hjá IMAK, har tey kunnaðu seg við Føroya Lærarafelag og skúlan og útbúgvingarskipanina í Føroyum. Eisini var pláss fyri hjá teimum at spáka í býnum í Havn og koyra ein túr norðureftir, nú føroyska veðrið vísti seg frá síni bestu síðu.
Grønlendska ferðalagið kom týsdagin, og tey eru farin av landinum aftur í dag. Mikudagin vóru tey í hølunum hjá Føroya Lærarafelag og fingu kunning um bygnaðin og virksemið hjá felagnum, og tey fingu eisini heilsa upp á starvsfólkini á Bókadeild Føroya Lærarafelags. Tey vóru hugtikin av øllum bókunum, sum Bókadeildin gevur út til børn og ung á føroyskum. Tey spurdu eisini um barnabløðini Píka 7 og Strok, sum allir næmingar frá forskúla til 7. flokk fáa ókeypis, tí at landið og kommunurnar stuðla útgávuni, og tey vónaðu, at tey kundu fáa somu skipan í Grønlandi.
Hósdagin vitjaðu tey Læraraskúlan, Glasir og Skúlan á Fløtum. Poul Guttesen, lektari á Læraraskúlanum, greiddi teimum frá Læraraútbúgvingini, Magni á Lakjuni, vararektari á Glasi, vísti teimum runt á Glasi, og Martin Karl Olsen, 1. Varaskúlastjóri í Skúlanum á Fløtum, tók ímóti á Skúlanum á Fløtum. Tey vóru spent at síggja skúlan á Fløtum og at hoyra um, hvussu tey skipaðu seg á skúlanum, nú tað verður bygdur ein risa skúli í Nuuk til 1.200 næmingar.
Á vitjanini komu vit eisini inn á, hvussu fakfeløgini samstarvaðu í Føroyum og í Grønlandi. Prátið kom inn á, hvussu vit, saman við seks øðrum fakfeløgum, hava skipað okkum í Fakfelagssamstarvið, og hvørjar fyrimunir vit fáa av hesum samstarvi. 37 tíma arbeiðsvikan var umrødd, og hvussu fakfeløgini í felag hava gjørt eina stóra útgreining av at stytta arbeiðsvikuna, sum myndugleikarnir kunnu hella seg til, nú arbeiðsvikan fer at verða stytt niður í 37 tímar.
Aftrat samstarvinum við grønlendska lærarafelagið, so hevur Lærarafelagið eisini samstarv við hini norðurlendsku lærarafeløgini, tað er ígjøgnum NLS, Nordiska Lærerorganisationers Samråd. Í norðurlendska samstarvinum er eitt serstakt samstarv millum okkum í útnorði, Føroyar, Ísland og Grønland.
